ఆమె చెప్పింది.. నేను చేశాను: భార్య జోస్యం నిజమైంద‌న్న జ‌డ్డూ

రాజస్థాన్ రాయల్స్ (ఆర్ఆర్‌) స్టార్ ఆల్ రౌండర్ రవీంద్ర జడేజా మరోసారి తన పాత ఫామ్ ను గుర్తుచేస్తూ అద్భుతమైన ప్రదర్శన కనబరిచాడు. లక్నో సూపర్ జెయింట్స్ (ఎల్ఎస్‌జీ)తో జరిగిన మ్యాచ్‌లో బ్యాటింగ్, బౌలింగ్ విభాగాల్లో రాణించి జట్టు విజయంలో కీలక పాత్ర పోషించాడు. అనంతరం రెండేళ్ల తర్వాత అందుకున్న తన 'ప్లేయ‌ర్‌ ఆఫ్ ద మ్యాచ్' అవార్డును తన భార్య రివాబా జడేజాకు అంకితం ఇస్తున్నట్లు ప్రకటించి అందరి హృదయాలను గెలుచుకున్నాడు.

ఈ మ్యాచ్ లో మొదట బ్యాటింగ్ చేసిన రాజస్థాన్, ఒక దశలో 77 పరుగులకే 5 వికెట్లు కోల్పోయి పీకల్లోతు కష్టాల్లో పడింది. ఆ సమయంలో క్రీజులోకి వచ్చిన జడేజా, ఒంటరి పోరాటం చేసి 43 పరుగులతో అజేయంగా నిలిచాడు. చివర్లో ఇంపాక్ట్ ప్లేయర్ శుభమ్ దూబే (11 బంతుల్లో 19 నాటౌట్)తో కలిసి 49 పరుగుల కీలక భాగస్వామ్యం నెలకొల్పి జట్టుకు పోరాడగలిగే స్కోరు (159) అందించాడు.

అనంతరం లక్ష్య ఛేదనలో లక్నో బ్యాటర్లను రాజస్థాన్ బౌలర్లు కట్టడి చేశారు. ప్రమాదకరంగా మారుతున్న మిచెల్ మార్ష్, నికోలస్ పూరన్ జోడీని జడేజా విడదీశాడు. పూరన్ (22) ను ఔట్ చేసి మ్యాచ్ ను రాజస్థాన్ వైపు తిప్పాడు.

మ్యాచ్ ప్రజెంటేషన్ సందర్భంగా జడ్డూ మాట్లాడుతూ.. "ఈ అవార్డును గుజరాత్ విద్యాశాఖ మంత్రి అయిన నా భార్యకు అంకితం ఇస్తున్నాను. నేను బాగా ఆడతానని ఆమె నిన్ననే చెప్పింది. ఆమె చెప్పినట్టుగానే నేను రాణించాను. బంతి సీమ్ అండ్‌ స్వింగ్ అవుతుండటంతో బ్యాటింగ్ చేయడం సులభం కాదు. అందుకే వీలైనంత ఎక్కువసేపు క్రీజులో నిలబడాలనుకున్నాను" అని చెప్పుకొచ్చాడు.

ఈ సీజన్‌లో అత్యల్ప స్కోరును (159) కాపాడుకుని రాజస్థాన్ అద్భుత విజయాన్ని నమోదు చేసింది. ఆర్చర్, నాండ్రే బర్గర్, బ్రిజేష్ శర్మ తలా రెండు వికెట్లు పడగొట్టగా, జడేజా, రవి బిష్ణోయ్ చెరో వికెట్ తీశారు. దీంతో లక్నో జట్టు 18 ఓవర్లలో 119 పరుగులకే ఆలౌట్ అయింది. ఈ విజయంతో రాజస్థాన్ రాయల్స్ పాయింట్ల పట్టికలో రెండో స్థానానికి ఎగబాకగా, లక్నోకు ఇది వరుసగా నాలుగో ఓటమి కావడం గమనార్హం.